di Bainzu Truddaju

Cando carrucaias a s’arzola

mannas de trigu da-e Sos Pianos,

fis sa sienda de sos chitulanos

padronos tuos: in su lettu tou

impremiat sabore ‘e pane nou

sa prosperosa ispiga campagnola.

Tando non fis che oe taruladu:

sas bandelas, sas rodas cun s’iscala

fin quintales ch’haian a pala

de indorados mannujos de trigu

e pariat finidu su castigu

de s’appetitu ‘e s’ierru passadu.

A s’impuddile sos boes ispanos

giunghia e in sa calma ‘e su manzanu

m’avviaia pianu pianu

cun su sede cumpostu subra tua:

tando fis forte e leaias fua

si a sos boes alzaia manos.

Non fis comente oe iscaderadu

e segadu e distruttu calchi pezzu

ti mancat puru, amadu carru ‘ezzu,

ca longos annos e-i s’abbandonu,

pro su motivu de cantu fis bonu,

t’han dadu paga ‘e su oe domadu.

Cantas mannas de trigu m’has carradu

e cantos longos saccos da-e s’arzola

pienos mi gighias a sa mola,

amadu carru, in su tempus antigu!

Tue alias pius de su trigu,

ca m’has fina su famine cazzadu.

Bidendeti distruttu in cussu ‘essu,

m’’enin fina sas lagrimas a chizos,

pensende chi sas penas e fastizos

s’umanu puru ponet in guai.

E finas deo so’ guasi gai:

che a tie in su totu mesu arressu.

Bastat, amigu meu, solo tue

non ses chi faghes sa fine ch’han fattu:

su casteddu, sa cheja, su palattu

in sa roda ‘e su tempus tene fine!

E tando in d’unu mundu ‘e purpuine

riposa como e frazigati in cue.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 161-162.