A manu tenta

bos apo leadu

e azis caminadu

in s’avreschidad

de sa vida.

Su coro

bos apo intregadu

e-i sa lughe

de sa die bella…

e azis carignadu

cun ojos felitzes

sas isperas

e-i sas prommissas.

Bos apo dadu,

fizos,

sos dolores de sos manzanos

de gherra,

s’allegria de sos seros

de paghe.

Azis imparadu:

sa vida est ispera

chi non morit,

es’ prommissa

chi non finit,

es’ gherra

chi faghet omines,

est allegria

de riu mannu

chi cantat pasadu

sa felitzidade

de un’iscuta.

Cfr. GIOVANNI SORO, Camineras, TAS, Sassari 2017, pag. 109.