Natale 2018 e Anno nuovo 2019

di Bainzu Truddaju

Cando ‘ido sos amigos

ballende su ballu sardu,

naro: “Millu s’istendardu

de sos omines antigos!”.

Deo puru ballaia

che marrocula o che fusu,

como non giuo piusu

pro mala fortuna mia.

Sas berrittas anda e torra

si ficchian che bandelas

a dogni brincu in sa sala.

Comaredda in sa pettorra

pariat ch’haiat melas

trinnighende a s’alza e fala

“Ahijà! Pesadendelu,

comaredda suerada!,

naraiat sa cantada

de unu chi est in chelu.

“Comaredda ojos de mare

e a mendula sestados

cantu faghides peccare

cun cussos marcos dorados!

Du… duru, di… diri, dara

como ch’hazis sueradu

paret de haer in cara

totu su chelu isteddadu

de istiu in notte giara.

Dulluru.. dilliriadu!”.

Cussu già fit su famosu

ballu ‘e su tempus passadu,

ballu allegru, ispiritosu,

ma però chena peccadu.

Mannos nostros l’han balladu

cando bramaian gosu

e in su dulze reposu

l’hana finas sonniadu.

Su sonadore sonende

pariat de ischidare

su mortu da-e sa cascia.

Omines fortes ballende

cun deas a man’a pare:

cantu briu, canta grascia!

Cfr. BAINZU TRUDDAJU, Rosas e ispinas de Baldedu, Silvio Melis Editore, Cagliari 1992, pagg. 204-205