Natale 2018 e Anno nuovo 2019

di Bainzu Truddaju

rima s'intendet lontanu lontanu

su ‘entu aberzendesi sos frontes

in lotta cun sos chercos e sos montes:

paret chi nde los cherfat isfundare!

Nues si pesan in colore ‘e mare

in s’orizonte pìdigu e mezzanu.

Tando da-e sas puntas pius malas

sas aes de sas rundas prejoneras

si pesan rodiende in sas aèras,

inghiriende cun alas ispaltas

e chirchende sas naes pius altas

pro s’intuppire inie a colpos d’alas.

Cominzat prestu ‘e sa tempesta s’ira,

de s’abba triulada chi a cadinos

paret falende: rodas de mulinos

podet fagher andare s’unda netta

e da-e tantu in tantu una saetta

che istriscia de fogu gira gira.

Sos tronos paren un’isfinimundu

zocchende accumpagnados da-e su lampu

chi a s’aberta ‘e s’aera badde e campu

s’idet, cun frascas, montijos e rios:

no esistin in giru esseres bios

sutta custu uraganu furibundu!

Sa tempesta atunzina fritta e fea

cando cominzat sa trumba a sonare

faghet feras e aes intanare

in sa perigulosa zona trista

e sighit tota notte pista pista

a sas vidas ponzendelis trobea.

Falat da-e sos montes pius altos

sa traschia ‘e sa notte e disaura;

su pastore corcadu in sa chijura

vegliat de s’ama sua s’interesse

e isperende ‘e che passare in presse

sa disaura mala ‘e cussos saltos.

Fattu die torrada est s’isperanzia,

su soligheddu tìmidu in su monte

si ch’accerat in s’altu ‘e s’orizonte

dende ristoru a feras e a zentes

chi pariat cunzendeche in sas mentes

unu vividu sonnu in lontananzia.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg. 120-121