Natale 2018 e Anno nuovo 2019

Dieci quartine di Stefano Demelas dedicate a chi ha dovuto cercare altrove lavoro e futuro. (c.p.)

---

Isteit poi 'e s'ultima gherra,

chi miseri'e famine hat batidu.

Custu populu sardu, opprimidu,

pro haer pane, cambiare terra.

Cosa chi mai, in tempus antigu

no s'allontanaiat sa pessone.

Andende a zapp'in fattu in su narvone,

ponzende fae, fena, orzu e trigu.

E si faghiat mannu e no teniat

bisonzu de andare in terra anzena.

Ne de lassare animas in pena,

sa vida haiat fine ue naschiat.

Ma fabricas de morte e minieras

hana confusu ogni fantasia,

de cudd'antiga e onest'allegria,

lassende sas connotas camineras.

Partidos sunu a mizas e custrintos

de fagher logu a chie est imbaradu;

in custu logu àrridu e brujadu,

chi los haiat pesados e lintos.

In meda sun torrados, ma ancora

ateros fizos de sa terra bella,

ispettan sa propizia istella,

de torrare unidos da-e fora.

Ogn'emigradu, attesu, tenet brama

sa 'idda sua cun su campanile.

E sonniat d'ogn'ora in su jannile,

s'abbrazzu caldu 'e sa propia mama.

Che rondine est su sardu, e s'allontanat

a chircare tribagliu pro campare.

Cudda piaga brutta had'a restare,

chi curamus pro sempre, e mai sanat.

Frades caros, de custa 'idda mia,

mi mancan'a s'appellu e m'addoloro!

Bido su sacrifissiu issoro

a manos giuntas, in pregadoria,

nende cun tottu: "Inoghe cherzo istare

in sa pinnetta chi m'hat fattu mannu.

Augurende a un'atter'annu,

d'esser'inoghe, cun bois 'umpare.

Cfr. Poetes a s’interinada, a cura di Sevadore Patatu, Edissiones de Sa Pro Loco, Zaramonte 1996, pagg. 21-23