Estate, tempo di vacanze, arrivo in paese di tanti chiaramontesi emigrati. All'estero e non. A essi dedichiamo questa poesia in terzine di Bainzu Truddaju, datata 1996 (c.p.)

---

De sas tantas premuras chi tenias

pro su paese tou caru tantu,

mi creo chi padronu ancora sias.

E ti des invocare a calchi santu,

prettendende de 'ider cantu prima

su logu de ue has rìsidu e piantu.

Cando fisti cun chie tanta istima

tenias, chi cun coro e cun sa mente

ti produiat s'affetu in s'anìma...

Sempre des haer pius che presente

dogni tradissione chi hat in mundu

in bidda tua s'adorada zente.

T'ammentas cando fisti pili brundu

sas festas chi connottu has a sos mannos:

ballende a manu tenta a ballu tundu.

E ti 'enit a mente ch'in sos annos:

sa zente tua cara e ospitale

fit rimediadora 'e sos affannos!

E des narrere: "Ah, tempus bestiale

cantu mi ses istadu e ses ancora

preghendeti 'e ti narrer fina male!

Da-e meda da’ 'idda che so fora

e sempre in gana 'e la torrare a bìdere,

ma però senza ‘enner mai s'ora!

Da-e sos mios fattu mi has dividere,

me tempus malignu, duru e feu,

senz’e mi consolare a ti dezzidere!"

O frade istimadu, ogni recreu

torrese a connoscher cantu prestu

cun dogni bene ch'hat formadu Deu.

Prosighi a tribagliare a visu onestu,

mancari vivas cun malinconia,

fattend' 'e 'idda tua ogni cuntrestu.

Permitti chi t'ammente in poesia,

amadu frade su tempus passadu,

e chi ti cante goi a moda mia.

E sias da-e Cristos aggiuadu

cando t' 'ides inogh'e ses cuddane.

Ma ammenta su dicciu antigu amadu:

"In dogni logu si mandigat pane!"

Cfr. Poetes a s’interinada, a cura di Sevadore Patatu, Edissiones de Sa Pro Loco, Zaramonte 1996, pagg. 34-35