Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

de Bainzu Truddaju

Prim' 'e cantare in chelu sa chilandra

in sos dulzes manzanos de abrile,

ses fatt'a s’ama o murghende in sa mandra.

Da-e prima 'e sas chimbe, a s'impuddile,

che unu rusignolu in s'adde amena

cantas armoniosu in su cuile.

In costera, in su monte o in s'ena

t'has fattu mandra, pasciale o pinnetta

e bramas ch’happas annada piena...

Ses da-e mes'attunzu a pan'e petta,

liberu, trancuillu in sa campagna,

isfidende de su chelu 'ogni minetta.

S'ama bella chi tenes pro cumpagna

in s'attunzu t'hat dadu sos anzones

cun petta saborida intro s'intragna.

Poi de s'instellàda, latte pones

in lamas e labias su manzanu

e cantas bellas liricas cantones.

In s'incantadu e fioridu 'eranu,

versu sa fin'e maju, in sa cunsorza,

sutta su dulze raju solianu,

leas puntuda, accutta, una resorza,

bocchis s'ultimu anzone nadu in maju

e che li 'ogas mattivuzu e corza!

Cuss'anzone o forsis calchi paju

ti servin pro sa festa 'e sa tusura

sutta s'alvure umbrosa cando has aju.

Da-e s'antighidade pius oscura

vives pro su pius in solidade,

godende in sa foresta aria pura.

Mancari che a prima, caru frade,

non ses fattende vita turmentosa:

finas sa legge, s'autoridade

t'aggiuat e ti porrit calchi cosa

cando siccagnas o s'abba crudele

ti faghet s'ama tua infruttuosa.

Bastat, sempre a s’ama ista fidele,

pastore, in s'arte tua dilettosu

che-i s'abe in sa chera e a su mele,

e sempre in s'onestade happas riposu.

Menzione d’onore al Premio di poesia sarda CREI-ACLI, Sassari 1989

Cfr. Vintichimb’annos de poesia sarda CREI-ACLI de Sardigna, ed Gallizzi, Sassari 2014, pag.23