Invia una email a famigliapatatu@gmail.com per farci sapere un tuo parere sul nostro sito

T’hapo connottu pizzinnu joghende,
in sos pastorizzales de sa domo.
In sa mente ancora ‘nde fentomo,
sa trama ‘e sa cuncordia tessende.

Intesu t’hapo sas primas peraulas;
fin giaras e ladinas a cumprendere.
M’abizaia chi, pro mi difendere,
fisi dispostu a narrer finas faulas.

Però cun megus fit sinzeridade
sa tua, d’ogni ‘olta chi t’idia.
Sa manu tua fit sa manu mia,
in allegria e in difficultade.

Cantas oras passadas sonniende
d’esser sos campiones de su mundu.
Poi nos giraimus e, in tundu,
b’haiat solu paza triulende.

Poi chi fattos no che semus mannos,
bidia custu mundu cambiadu.
In pedde nostra hamus imparadu
a connoscher tranellos e ingannos.

Ma sa cuncordia tessid’una ‘ia
cun nois la faghiat de padrona.
In die mala e in die ‘ona,
cun alas de orgogliu e fantasia,

nos hat mantesu ligados appare
in orizontes fin’a s’infinitu.
O in carrela de su nostru abìtu,
ue cominzad’hamus a giogare.

Mancu sa morte fea ‘enit timìda,
cando s’amigu tott’or’est presente.
Illuminat che sole d’ogni mente.
Poi, s’est sa cussenzia pulida,

timoria no b’hat in custa terra
de males e amarguras semenada;
sa janna aberit finas s’est serrada
e ponet paghe ue faghen gherra.

Rispettu, amore e paghe tessìda
siat in coros chi cudreles sunu.
S’amigu caru chi tenet d’ogn’unu
in custu mundu est sa propia vida.

Zaramonte, su duos de Masthu de su 2001