E' possibile esprimere un voto sul gradimento degli articoli da noi proposti. Ti invitiamo ad esprimere un tuo giudizio e vedere i giudizi degli altri lettori.

Currèmus a su foghile

ca est die de pinneta,

sa die est troppu inchieta,

non si cheret abbonare:

oe est die de istare

tota die intro 'e domo.

Currèmus, currèmus como

a intro a nos iscaldire,

prîte paret chi sighire

cherfat s'abba in cust'istante.

Nues bi nd'hat bastante

in s'aèra inghiriende,

un'iscuta est pioende

e-i s'atera annuada:

sa die est troppu allizada

mustrendesi assai male.

Già chi semus in nadale,

su tempus est rigorosu:

a su pasculu est dannosu,

a su trigu est tempus vile.

Currèmus a su foghile!

Custos versos sun bistados fattos duos meses prima de giompere sos seighi annos, unu sero piopinosu de su 1936, a calore 'e su fogu in sa pinnetta de Baldedu: sa prima de tantas "mischinidades"!