Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

Sas manos mias sun su pane meu;

cando las miro tortas e nodosas

tratendelas pro milli e un’impreu.

Sun totu pistas e gallosas,

cancaradas in manzanada fritta;

ma sempre prontas a totu sas cosas.

Pagu galentini in sa proa iscritta,

ma mi difenden dai sos attacos

finas si b’hat calc’ugna biaita.

Torro su sero a brazzos istraccos;

issas ancora sun prontas a dare

su contributu, che bonos teraccos.

S’aunini astrintas pro pregare,

accopiadas in signu ‘e perdonu

mirend’a Cristos in su Santu altare.

Cun issas no so’ mai in abbandonu,

delizian pro s’istrinta ‘e manu

dae su coro si s’istranzu est bonu.

O si saludas unu paesanu,

li naras tottu cun sa manu alzada

“Ba’ in bono’ora e ista sempre sanu”.

O si toccheras in manu de fada

su visu delicadu cun carignos

d’amore a sa cumpagna tantu amada.

Sun tantos, chena contu, sos impignos

Dende sa manu a una criadura

In su caminu ‘e milli dissignos.

Mai trattadas sian pro sa fura

sas manos mias, chi sian pulidas,

lontanas dai cussa btujadura.

De cos’anzena mai abbramidas,

sempre estidas de sinzeridade

chi han connottu cando sun naschidas.

Tramas de rispettu e onestade

desizo sempre in su coro meu

e manos bonas de abilidade.

Tribagliadore, custu mundu intreu,

senza bisognu ‘e fagher majias,

istemus tottu in manos de Deu.

...su pane meu sun sas manos mias.

Zaramonte, su vinti ‘e Majiu de su 1995