Home » Limba Sarda » Patatu Giuanne, poeta pintzionadu » Giuanne Patatu: Como e tando

Immagini del paese

Immagine 008.jpg

Statistiche

Tot. visite contenuti : 9978372

Notizie del giorno

 
Giuanne Patatu: Como e tando PDF Stampa E-mail
Martedì 01 Gennaio 2008 14:39


In su comintzu de su 1900 so nâdu deo da-e una famìlia numerosa; so su e de ses fizos, poveros in canna. Viviaimus tottu in d'una istàntzia; bi fit su furru pro còghere su pane e-i sa fogulaja fit addainanti de sa 'ucca 'e su furru, chena tziminea. Su fumu si podiat segare a fittas, comente 'ides sa nèula in sa basciura; non nos bidiaimus pari pari. Pro chi 'essire su fumu bi fin sos isperajolos in sa copertura, chi non bastaian a che lu 'ogare tottu su chi si produiat. Custu fit su drettu cughina (zona giorno li naran como).

Su drettu notte (sa zona notte, a sa moderna) fit costituidu da-e sos lettos altos de istile de tando. Ue fin sos lettos bi fit s'istoja pro non bi faghet falare piùere e fumàdigu subra a sos lettos e in cara a chie bi fit drommidu. Sos lettos fin a saccone, pienos de paza 'e triughìndia, o paza de orzu. Custu materiale faghiat s'istajone; a s'incunza noa bisonzaiat de procurare paza noa. Sa bòveda fit a carre a cobertura, s'incannitadu e-i sa tèula sarda, fatta in sa 'Ena 'e Concas. Sa canna non frazigaiat mai; l'affoltiat su fumadigu; su pamentu fit de terra de Santu Giuanne, famosa pro ismaldos de terra e de furru, chi 'eniat mazadu pro non si calpire. Cando pioiat meda sa teula inciuppiat s'abba e falaian sos buttios mortos, chi faghian su fossu in terra. Sas istigas chi daian a cara e a dossu in colore 'e caffé chi pariaimus tottu pibirinados. Sa domo 'eniat illattada onzi annu a calchina bianca, ma non bessiat mai bianca; fit tra ruju e rosa; non b'aiat de cumpònnere ne de isbagliare colore, bastaiat de lu dare biancu e-i su suttafundu faghiat su restu.

Su manzanu non fit possìbile de si trattennere in su lettu, ca babbu e mama si pesaian chito e faghian sùbitu su fogu; e tando bi fit su fumu chi ti nde faghiat pesare a mala gana. Cando fit die mala chi non b'aiat iscola, istare in domo fit un'inferru; fumu e buttios mortos, non si podiat istare; a bessire fit tempus malu, frittu e abba, fimus mesu nudos, iscurtzos e, pro parte male aggianta, male nutridos. A su bisonzu toccaiat de ch'istuppare a fora, a domo de calchi amigu, ma sa differèntzia non fit meda. Calecunu aiat s'appusentu e cusina, ma in sa gianna, chi fit a cricca, su 'entu la giughiat sempre tricchi tracca. Sutta sa gianna, chi b'intraiat s''attu, su fumu intraiat filtradu, chena remèdiu perunu.
“Torra a domo - mi naraiat mama; - oe est su 'entu de nanti e sos isperajolos non dan abaltu a su fumu; pro cussu setzìdebos in basciu e faghide sa gianna a coloru”.
Tando poniaimus mente e, a suladore in manu, sulende e acchicchende, immattende su fogu e-i sa chijina, pro atzendere mezus e còghere fae in braja e lande suerina; e gai, a su dibi daba, che passaiat sa die.

Sa notte bi fit sa chena; aimis sa banchitta tunda cun d'unu calasciu pro sas forchettas e cocciales. Cando mandigaimis cosa dura, sas dentes de sas forchettas si intostaian; cando b'aiat coccoi si daiat bolta unu corru 'e sa forchetta pro nde lu poder bogare da-e sa buccia. Nos setziaimus tottu in giru a sa banca cun sos banchittos de urtiju. Sos piattos fin de terra ruja cun intro lùtzigos de pintura groga; si naraian piattos de soddu, ca costaian unu soddu s'unu; a prima posta, daghi ponian sa cosa troppu calda, calecunu si crebaiat. Su chi li sutzediat, restaiat chena piattu e, pro mandigare, deviat isettare chi esseret finidu un'atteru, pro li ponner su màndigu. Sa padedda, manna, fit de terra cotta, pro b'istare su mandigu 'e tottu. Si poniat subra sa tribide, acchicchende fogu, buddende a totta fua, si trattaiat pro bi cogher su brou e pro fagher buddire sas atzolas. Falada da-e sa trìbide, bi fit su tidile pro non si segare, e da-e inie, una trudda pienaiat su piattu. Ite fit su màndigu non s'ischiat fintzas chi fit fora 'e sa padedda; su màndigu fit a s'inzestu; su pius fit basolu cun ervuzu, o fae; a boltas pane cottu, pan'a fittas o pan'untu. Custas fin sa "pietàntzas" pius in usu. Daboi chenadu, a boltas, s'istudaiat sa candela, a segundu de s'andamentu e-i sa fortza de sa die, a lughe de fogu, e cun tres centèsimos de ozu pedròliu faghiat sa notte. Tottu inghiriados a su fogu, babbu nos faghiat contados e poesias e nois, tottu a orija parada, iscultaimus.

Sos giòvanos de como non sun cuntentos; an tottu, nutridos bene, ispoglias de moda, sa moto, radio, màcchina, giogos de onz'iscera, ballos, divertimentos pius che trabagliu, aggiuados in sas fadigas, cun mesos tènnicos chi s'òmine at postu a disposissione de s'umanidade; sos trattores, mietitrèbbia, panifìtzios, casifitzios, betumieras, montagàrrigos, motosegas, tottu pro miminare sa fadiga a su trabagliadore. E non sun cuntentos! No an amore a nisciunu: ne a su trabagliu ne a sa zente; sun indifferentes a su bene e a su malu! Medas odian su babbu e-i sa mama, chi non lis dan tanta libertade; cheren dinari a ispèndere de su chi an trabagliadu sos mannos insoro, lende viscios de onzi manera e prepotèntzia.

Bi sun sos brigatistas chi faghen sos maniales de sa violèntzia chenz'ischire ite sun fattende; a ite cheren arrivire, perdende sa gioventura, finèndeche in prejone o cun sas bottes assoliende chena cambiare su mundu; sun illusos, cheren fàghere che-i su erittu a sustenner su mundu a petta e a lardu. In parte si drogan, guastende s'esistèntzia insoro e de sa famìlia. Cantas mamas afflittas! pianghen su restu 'e sa vida pro culpa de su fizu iscunsideradu.

E tottu custu est ca est troppu su benèssere connotu pro mèritu de su trabagliu e de sos sacrifissios anzenos. Issos non b'an iffustu pòddighe e non resessin a intrepetare ite bi cheret pro l'àere e non sun zente lega. Custu benèssere non l'ischin appretzare; bisonzat de patire, ca chie non patit no appretzat. Giovanos, como rendìdebos contu chi s'isperièntzia l'amus fatta sos chi sun nàschidos in sa pitzinnia de su printzìpiu de su 1900.

Ultimo aggiornamento Giovedì 19 Febbraio 2009 15:26
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):