Desideriamo formulare ai nostri lettori tanti auguri di buona Pasqua.

di Bainzu Truddaju

n custas nottes passadas,

a mesanotte prezisa,

una fada s’est dezisa

de cherrer s’innamoradu,

e in s’ora han cumbinadu

un’isposonzu ‘e fadas.

Cussas tanas o domittas

fin pienas de zentoria:

fin sas fadas in baldoria,

minoredduzzas ciarrende;

e bi nd’haiat pasende

in cadreas e banchittas.

Fin a las bider ballende

zertas fadas minoreddas:

giughiana tres bunneddas

bene presas a istrinu,

duas pijadas in chintu

e-i s’atera pendende.

Da-e mesu sos fundaghes

de su mare, cantilenas

preparein sas sirenas

pro cantones e pro riere

e bi fin passende a biere

sas ninfas de sos nuraghes.

Ite bella festizzola!

Da-e chelu sas istellas

mandaian lughes bellas

pro candore a sa foresta.

E ancora posta ‘e festa

fit sa luna cun s’arzola.

Isteini fin’a s’una

in baldoria e mattanas

ninfas, sirenas e gianas[1]

incantende terra e chelu,

finas chi poi unu ‘elu

s’est postu subra sa luna.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg.86-87.