E' possibile esprimere un voto sul gradimento degli articoli da noi proposti. Ti invitiamo ad esprimere un tuo giudizio e vedere i giudizi degli altri lettori.

di Bainzu Truddaju

I

Ite cunzertu bellu su manzanu

chi pigat da-e s’adde ancora oscura:

paret ringraziare sa natura

custu motu canoru chitulanu.

Sun sos puzones chi a su ‘eranu

intonan de sa 'oghe sa bellura,

chi possedit dogni essere mundanu.

S’ama falat gioghende da-e s’altura,

cuntenta de versare tra pag’ora

su latte chi l’hat dadu sa pastura.

S’abe est de sa domitta a parte ‘e fora,

ca de ‘essire a pasculare hat cura

e isettat sa lughida natura.

II

Poi una rujura in s’orizonte

s’idet de totu custo a sa pag’ora:

a pagu a pagu est boghende sa fronte

su sole cun su carru ‘e s’aurora.

Daghi ndi ‘essit bene a parte ‘e fora,

ch’est cominzende a tracciare su ponte,

ervas, piantas, feras de su monte

paret chi esultan de pius ancora.

Sas bajaneddas da-e sos cuiles

s’iden andende peri sas funtanas

cun cadinos e broccas e bariles.

In carrela sas bezzas filonzanas

naran antigos contos de foghiles

e critican sas birdes paesanas.

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pag. 175