Invia una email a famigliapatatu@gmail.com per farci sapere un tuo parere sul nostro sito

di Bainzu Truddaju

Baddes de Moronzanos istimadas,

padronas de antigos passos mios:

mi ‘iso dogni tantu in cussos rios

ambiddende e passende oras biadas.

Cue sun sas columbas annidadas,

astores leperajos, zilibrios,

paladinos antigos sempre ‘ios

cun ninfas balladoras e cun fadas.

Sa musica sonora de sas undas,

chi est incue durante s’ierru,

mi ‘asat dogni tantu sa memoria.

Pius no hap’a bider cussas rundas,

ca penas brujadoras de inferru

m’han furadu sa forza e-i sa boria.

Imperat cue su regnu ‘e sas toncas

cantende notte manna oras e oras,

cue passan sas abbas curridoras

de Chirralza, Giunturas e de Concas.

Has in percias e feas ispeloncas

piberas velenosas e coloras,

boghes porosas e astuddidoras

de corvos, ruspos e de tirrioncas.

Nos narat sa leggenda, una femìna

cantat cue sa notte: “Una funtana

fia prima de abba cristallina.

“Como so’, e da’ epoca lontana,

una manna e tìmida pischina

e che cantat mazzone, grigliu e rana!”.

Ma non solu mazzones e astores

bi cantana e sempre b’han canradu:

una ‘olta chi t’hana visitadu

de Sardigna sos mezus iscrittores,

pro sos ammajos tuos e colores

t’han paginas de oro dedicadu

e versos ch’han iscrittu e pubblicadu

los cantan fattu a s’ama sos pastores.

Un’atera leggenda narat puru

chi si b’intendet unu frailarzu

pistende ferru in nottes de iscuru.

Ma in custa leggenda ne in cudda

boghes de mortos, zoccos de attarzu,

deo non b’hapo intesu mai nudda.

Cfr. B. TRUDDAJU, Rosas e ispinas de Baldedu, Franco Melis editore, Cagliari 1992, pagg. 72-73.