di Bainzu Truddaju

A babbu l’hapo appenas connoschidu

cando fit pro raggiungher gosu e pasu:

issu fit altu, istrizile, romasu,

oji celeste, cuccuru ispilidu.

In su fronte e in manos incrispidu,

bucca minore e minore su nasu;

de salude, s’iscuru, troppu arrasu

forsis fit da-e sa naschida ‘estidu.

Annos contadu nd’hat barantasette,

bestiat in berritta, in cappottinu,

cun s’arva pinta de canu e de ruju.

Fit calmu, fit onestu, fit poete,

andaiat a bacchiddu ca, mischinu!,

hat hapidu unu colpu a su ‘enuju.

1951

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pag. 176.