Invia una email a famigliapatatu@gmail.com per farci sapere un tuo parere sul nostro sito

de Istevene Demaelas

Isteit poi ‘e sultima gherra,

chi miseri’ e famine hat battidu;

custu populu Sardu, opprimidu,

pro haer pane, cambiare terra.

Cosa chi mai, in tempus antigu

no s’allontanaiat sa pessone,

andende a zapp’in fattu in su najvone

ponzende fae, fena, orzu e trigu.

E si faghiat mannu e no teniat

bisonzu de andare in terra anzena;

né lassare animas in pena,

sa vida haiat fine ‘ue naschiat.

Ma fabricas de morte e minieras

hana confusu ‘ogni fantasia

de cudd’antiga e onest’allegria,

lassende sas connottas camineras.

Partidos sunu a mizas e custrintos

de fagher logu a chie est imbaradu

in cussu logu arridu e brujadu

chi los haiat pesados e lintos.

In meda sun torrados, ma ancora

ateros fizos de sa terra bella

ispettan sa propizia istella

de torrare unidos da-e fora.

Ogn’emigradu attesu tenet brama

sa idda sua cun su campanile

e sonniat dogn’ora in su jannile

s’abbrazzu caldu ‘e sa propria mama.

Che rundine est su sardu e s’allontanat

a chircare trabagliu pro campare.

Cudda piaga brutta had’a restare,

chi curamus pro sempre e mai sanat.

Frades caros de custa ‘idda mia

mi mancan’a s’appellu e m’addoloro!

bido su sacrifiziu issoro,

a manos giuntas in pregadoria,

nende cun tottu: inoghe chelzo istare,

in sa pinnetta chi m’hat fattu mannu,

augurende a un’ater’annu

d’esser’inoghe cun bois umpare.

Cfr. Poesias de Istevene Demelas, Grafiche Essegi, Perfugas 2012, pagg. 85-86