Home » Personaggi » Chie s’ammentat de Antoni Montesu?

Immagini del paese

Chiaramonti panorama 19.JPG

Statistiche

Tot. visite contenuti : 11016083

Notizie del giorno

 
Chie s’ammentat de Antoni Montesu? PDF Stampa E-mail
Valutazione attuale: / 14
ScarsoOttimo 
Domenica 24 Aprile 2016 12:29

di Salvatore Patatu

Antoni Montesu fit giamadu in bidda Caboce, pro su fatu chi fit istadu feridu in sa gherra de Ispagna, e, cando faghiat sos contos, naraiat sempre chi l’aiat feridu a la cabeça, a conca, unu mulu cun calche, chi bi l’aiat aberta che melagranada.

Cando l’atopaia in su Munimentu o in calchi butighinu, mi faghiat contados e barzelletas e las ischiat puru contare bene meda, cando fit apena apena leadu a binu.

Una ‘olta m’at nadu: “Amigheddu meu, tue ses unu de sos pagos giòvanos chi mi aprètziat, ti tratenes cun megus e aiscultas su chi naro. Deo no apo a niunu chi s’ammentet de me. Ammentadinde tue, si podes. Ammèntalu tue a Antoni Montesu chi at sa disgrascia de no àere a niunu chi si nd’ammèntet”.

Fimus sètzidos addainanti a su butighinu de Multineddu in sa Pigadorza e no apo mai ismentigadu custa prommissa chi l’apo fatu. Ogni ‘olta chi pigo a campusantu passo a l’aciapare e, sa die de sos mortos, li ‘ato sempre unu fiore. Ma, in su loculeddu, ue sun arribados sos ossos suos, de fronte a una de sas tumbas pius bellas de su campusantu de ‘idda, ue b’at tres mesosbustos de Sartorio e de Usai, boltas meda b’aciapo fiores friscos postos dae àtera zente. Signale custu chi non so su solu a s’ammentare de Antoni.

Cando est mortu, deo fia militare e, una degnina de annos apoi, ammentendemilu, l’apo iscritu custu soneto; chi, de seguru, no est unu capolavoro, ma so fieru de l’àere iscritu ca est cumpònnidu cun afetu coriale.

Ammentèndennos de Antoni, faghimus a modu e a manera de ammentare totu sos mortos tzaramontesos (e sun meda, a dolu mannu), de sos cales niunu s’ammentat pius. E ognunu dei custos at trazadu su bàrriu de sa vida, cun fadigas mannas e isperas minudas, pro tentare de mezorare, pro cantu podiat, sa bidda nostra.

Pensade a cando Antoni s’at garrigadu sas campanas a pala e che las at pigadas a campanile; e a tantos àteros chi b’an postu sa pedde in gherra, in paghe, in tribagliu...

Apo postu una nota de ispiegassione in finitia, non pro àere paga fidùtzia in sa cultura de sa zente chi legget, ma solu ca l’aia posta cando apo iscritu su sonete; tando fia professore in atividade. Leàdela pro “defrommassione professionale”, difetu chi acomunat sos mastros ei sos professores chi an seberadu cussa facultade cun amore e passione.


A Antoni montesu, fizu de Tzaramonte

 

Sode che granitu ‘uddusoinu,

erede de una ratza abbandonada,

fis Antoni Caboce. Ogni ‘ighinu

t’imbidiaiat sa fortza ismesurada!


Coraggiu de leone aisti in sinu,

altu che una bandela isventulada,

campèndedi sa vida pellegrinu,

masedu che culumba ammaestrada.


Sos vates an cantadu eroes beros,

tra sos cales Aiace Telamòniu

che a tie pro disdicia e balentia[1].


Paga cosa sun, ma sun sintzeros,

custos versos, chi as pro patrimòniu,

ca che a issu no as rediadu poesia!

 


[1] Aiace Telamonio, daboi de Achille, fit s’eroe grecu pius forte e valorosu de sa gherra de Troia. Cando est mortu Achille, sas armas suas devian èssere dadas a su cumpagnu pius forte e pius meritòriu de sos rèes Acheos, chi fit pròpiu Aiace. Ma Ulisse, pius polìtigu e pius malintragnadu, cun pius aderèntzias e racumandassiones, est resessidu, cun ingannias e trobojos, a si las fàghere assignare (s’òmine est istadu sempre su mantessi: a chie podet fùtere de pius). Aiace, dae su dolore, nd’est mortu! Una leggenda narat chi sas undas de su mare, ghiadas dae sos deos, an furadu sas armas dae sa nave raminza de Ulisse e che las an depositadas subra a sa tumba de Aiace. Ugo Foscolo, unu poete mannu de s’otighentos italianu, a propòsitu dei custu contadu, narat in sa poesia sua “I Sepolcri”: “Giusta di glòria dispensiera è morte”. Sa morte torrat a donzunu sos mèritos chi non li sun istados reconnotos in bida.

 

Ultimo aggiornamento Lunedì 25 Aprile 2016 14:20
 

Aggiungi un commento

Il tuo nome:
Indirizzo email:
Titolo:
Commento (è consentito l'uso di codice HTML):