Giuannantoniedda Marinera,

sa muzere de "Peppe Bonumore",

s'hat fattu una brillante carriera

in sos giardinos de su disonore.

Dies connottu nd'hat malas e bonas

intro de unu rustigu apposentu,

ca non cherfende servire padronas

fatteit cussu passu a pagamentu.

Fit mestiere dulze e li rendiat

senza sagrificare, ne servire:

"Cue non bi hat peccadu – naraiat -

peccadu est a furare e a bocchire!"

Cando fit giovanedda, de irde pumas,

fit s'iscasciu 'e sos giovanos de 'idda:

fin sempre inie a fiottu e trumas

e ancora non fit mancu pobidda!

Una sienda manna intantu hat fattu

in s'iscandalizadu mundu sou:

s'hat costruidu in bidda unu palattu

ispazziosu e a istile nou.

Su maridu, s'iscuru, ignorantone,

tribulat, curret, bolat che-i s'ae:

lu 'ides sempre in giru in s'istradone

cun pala o piccu inoghe o cuddae.

Però issa non paret pius issa,

mancari siat frisca e sempre bella:

andat a cheja e s'intendet sa missa

e pregat che una Santa verginella!

Non movet passu, ne ojos, ne laras

chi non tenzat mirada piedosa,

ma guai a tie si li naras

de cudda carriera calchi cosa.

Gia ch'a bezzesa sabia diventas,

rosaria in cheja, canta e prega

e faghes bene, si non ti lamentas

chi currias pius de s'ebba zega!

E tue, "Peppe Bonumore", sias

sempr'allegru e serenu, senza dare

attenzione a sas mimulas mias

e de chie ti solet critigare.

2° classificato al Premio di poesia sarda CREI-ACLI, Sassari 1989

Cfr. Vintichimb’annos de poesia sarda CREI-ACLI de Sardigna, ed Gallizzi, Sassari 2014, pag.32