Natale 2018 e Anno nuovo 2019

de Tore Patatu

Cleopatra fit una fèmina bona,

ma sol’in s’apetìtosa carena,

chi la daiat che chi fit anzena,

pro s’illoddiare potente in sa trona.

Innanti a Cèsare at dadu sa “mona”,

poi a Antoni l’at postu in cadena.

Ma a Otavianu non l’at fatu pena

e nde l’at imboladu sa corona.

Ite pecadu! de una reina

a rifiutare su frutu delicadu,

chena li dare nessi un’assazada.

Non potend’aer sa giusta errina,

cun su serpente issa at rimediadu,

e est cussu chi l’at avelenada.

In tempesta est torrada,

che ae mala, meledende vindita,

ammentèndesi de cudda iscunfita.

Ma s’Isula invita,

tota in fortza e coragiu s’est aunida,

solidarende, bintu at sa partida.

Augurende sa vida,

ch’in s’annu nou siat meda pius digna

sanende sos males de Sardigna.

E sa sarda insigna

pius non siat triulada da su bentu

e de Cleopatra perdemus s’ammentu.

Su pòpulu cuntentu

epat sa paghe chi si pregat issu,

cun su bene in sa mente sempre fissu.

Biadia pro totu siat in ogni fatu,

augùrios corales dae Tore Patatu.