Sas bamas fini totu impascialadas,

sos pastores dormende in sa pinnetta;

s'aéra buluzada e pagu netta

pariat minattende temporadas.

Dogni tantu su cane in su presorzu

si pesaiat a ciunciu sighidu,

e-i su grodde cun tonu arrughidu

s'intendiat cantende in su mortorzu.

Sa luna dogni tantu da-e su chelu

tìmida si daiat s'accerada,

ma issa puru fit incuguddada

de unu burrascosu oscuru velu.

Ma non solu sa faccia de sa luna

s'haiat postu 'e luttu su manteddu:

s'elighe de carrela fit nieddu

e ne istellas s"idiat manc'una.

lntantu in su chelu fin in giogu

sos tronos rumorosos e lampizos;

tiu Zuseppe nd'ischidat sos

fizos e acchiccat sas brajas de su fogu.

Ma falende de s'abba sos buttios

sa 'ude 'e sa pinnetta colaiat;

su 'ezzu dogni tantu naraiat:

«Ite notte niedda, frades mios!

Nd'hapo 'idu de nottes, ma che-i custa

forsi non nde haia bidu mai:

sos rios sun a urulu, in guai

sutta s'ira malefica e robusta!».

Tiu Zuseppe, a ciunciu e a mattana,

naraiat de gai in sa pinnetta,

cando da-e su chelu sa saetta

filtraiat sa lughe in sa ventana.

Appenas chi hat dadu s'isgiarida,

sas bamas fin a belida in sa mandra;

in s'altu de su chelu una chilandra

pianghiat cun boghe addolorida.

Non nde torret a benner notte fea

che-i custa passada in su cuile,

ca sos pastores fin’a s'impuddile

fini senza dormire a notte intrea.

Cfr. BAINZU TRUDDAIU, Rosas e ispinas de Baldedu, Ivo Melis editore, Cagliari 1992, pagg. 126-127.