Una die tiu Giuanne Seu est andadu a cantare a Sant’Anna Arresi, acurtzu a Sant'Antiogu e a Giba, de fronte a s'Africa e, de comente est arrividu, in trenu o in pulma, si l’est presentada custa bidda campidanesa a infora de su tempus. Unu caldu ch’ispistiddaiat sa roca, chi non b’aiat pòtidu arresetare mancu sa colora. Sunt bènnidos sos oberajos a lu leare e, mirèndelis s'aerzu, in caminu mantessi at pessadu custa otava:

Sant’Anna Arresi est trista una dimora

E paret chi passadu ch’est su fogu;

abitada dae zente patidora,

cari minuda e de colore grogu.

Chie s’inferru non l’at bidu ancora

Lu podet agatare in custu logu;

at a esser malu su chi at fatu Deus,

ma custu paret milli boltas peus.