Invia una email a famigliapatatu@gmail.com per farci sapere un tuo parere sul nostro sito

Mamma mi toccaiat in su bulzu

cun boghe imperiosa nende a mie:

«Bessimi da-e nanti, gioga e rie

chi frebba non nde tenes una riga,

o anda a visitare, a moda antiga,

parentes e amigos de acculzu!».

Deo partio a brincos e a giogu

in s'unda 'e su beneficu recreu;

su sera recuiat babbu meu

istraccu da-e tantu tributare

e poi sezziamus a chenare

in s'antiga pinnetta a lughe 'e fogu.

Tando fin tempos de promissas veras,

su mundu mi pariat totu rosas;

non nde 'idia penas fastizosas

ne problemas de 'inaris pro sa vida:

totu fit un'iscena fiorida

da-e sas frascas fin'a sas aéras!

Ite tempus pacificu su meu!

In cuddas temporadas de su nie

giogaimus a boccias tota die

cun sos cumpagnos mios e fedales,

isfidende sas iras de sos males

chi cun su nie mandaiat Deu.

E da chi sa fiocca passaiat,

fin rizolos de abba sas carreras;

cuguddadas e feas sas aéras

noa minettaian temporada,

e da chi sa tempesta fit passada

in su chelu su sole riaiat.

Como han finidu sas curreras bellas,

sos mios giogulanos pensamentos

sun isparidos cun nies e bentos,

comente unu sonnu 'e criadura:

mama non ch'est pro mi rendere cura,

ne conto pius in chelu sas istellas.

Cfr. BAINZU TRUDDAJU, Rosas e ispinas de Baldedu, Ivo Melis Editore, Cagliari 1992, pagg.98-99