A fine Febbraio chiuderemo definitivamente il sondaggio sul nuovo anno. Ma chiameremo i nostri lettori a esprimersi su un altro quesito, che proporremo a decorrere dal 1. Marzo prossimo.

«Cantu ses bellu messaju cand'aras!»,

neit in "Su Messaju" Pedru Casu,

cando murmuttaiat chena pasu

«cun risu in coro e pregarìa in laras».

Tando lampizaian sas arvadas

de s'aradu 'e linna in sos atunzos,

chi frundiat in terra oro a punzos

e fini sas campagnas populadas.

Fumaian sos sulcos su manzanu

a su sole jocundu 'e Sant'Andria

e su messaju a sa prima giarìa

si ninnaiat cun su trigu in manu.

Fis bella tando, Sardigna istimada,

ma oe ses ancora pius bella:

in sa Costa Ismeralda ses istella,

che perla in sa tela ricramada.

No has vias pius a impedrados,

ne ainos, ne caddos in sa gianna

cun sos imbastos garrigos de canna

e bertulas e saccos affumados.

Has cambiadu mantu a ti 'estire

a pompa sas piattas e carrelas:

alzache fin'a chelu sas bandelas,

ca su progressu t'hat fattu imbellìre.

T'han fizos tuos cantadu e brindadu

a su «bomborombò» in sas pinnettas,

e-i sos chi connotu has poetas

t'han cun versos de oro ricramadu.

Cando 'enin pro t'ider sos turistas

e miran sas bellesas chi possedis,

a coro in manu a bider lis cunzedis

sas pittorescas naturales vistas.

Ses bella, tenta in coro e adorada

da-e sos tuos caros emigrantes,

chi sun in terra anzena tribagliantes

cun d'una nostalgia ismisurada.

Bastat, Sardigna mia, sighi e faghe

in sas tuas bellesas e impignos,

e-i sos fizos ch'has siana dignos

de amare sa terra 'e su nuraghe

Cfr. Bainzu Truddaju, Rosas e ispinas de Baldedu, Ivo Melis Editore, Cagliari 1994, pagg. 96-97