Natale 2018 e Anno nuovo 2019

Cando serena falat sa fiocca

in sos primos tres meses de s'annada,

in nottes d'entu e de temporada

sos sonazzos s'intenden zocca zocca.

Su teraccheddu si alzat sa brocca

de abba frisca e dad'un'intasada.

Pensat: "Est notte 'e craba inconcheddadà"

e s'affìanzat coment'e una jocca.

Fin populados fina sos barraccos.

Como de cussa zente pius non c'hada

de abitare in cussas dimoras.

Non b'hat pius padronos, ne teraccos

in sa campagna nuda e desolada,

regnu 'e ziligugos e coloras.

Cfr. Poesias de Istevene Demelas, tip. Grafiche EsseGi srl, Perfugas 2012, pag. 22