Desideriamo formulare ai nostri lettori tanti auguri di buona Pasqua.

In chelu lughet sa luna piena

in custa notte santa de istiu,

s’ispijat in sas abbas de su riu

e curret una nue in mesu s’ena.

Su cane est presu a s’alvure ‘e s’olia

de un’istazzu isperdidu ‘e Su Sassu

e attesu s’intendet unu passu

allegru ‘e unu caddu in fantasia.

Sas ranas de s’istagnu e de su poju

sunu a cantilena cantuzzende

e s’abe industriosa est refinende

su mele saboridu intro su moju.

S’aladu regnu in tuppas est dormidu,

solu sa tonca hat ciuncios de piantu

da-e su chercu mannu e dogni tantu

unu grodde s’intendet arrughidu.

Est una notta santa veramente,

mancu sas fozas trinnigat su ‘entu,

non s’intendet de ae unu lamentu

chi tocchet coro o chi affannet mente.

Sos pastores de s’Adde e de sa zona

sun reposende a costazu ‘e sas bamas

cun in coro e in mente milli bramas

de fagher una noa annada ‘ona.

Sonnian, miran su latte a caldajas,

lamas de latte subra unu puddedru

e in su fogu ‘e sa pinnetta ‘e Pedru

sun consumende sas ultimas brajas.

Toccat coro s’andare in sa foresta

cando sa notte est pasida e chieta

e-i s’aera pura, giara e netta:

est una meraviglia posta ‘e festa!

Cun frunzas de puresa e de candore

riet sa notte in mantas colorida

a dogni esistente dende vida

pro mesu de s’Eternu Creadore.

Bastat, notte incantada, notte amena

chi das a su poeta estru e pinna:

tue m’ammajas che risu ‘e pizzinna

sutta s’incantu de sa luna piena!

Cfr. BAINZU TRUDDAJU, Rosas e ispinas de Baldedu, Ivo Melis editore, Cagliari 1992, pagg. 94-95