Desideriamo formulare ai nostri lettori tanti auguri di buona Pasqua.

Risitos, ses solu risitos.

Framadas de prata

t'allupian sos ogros

de isetu

e de cras assolados.

Est sa morte de sas dies.

Mere de liminarzu

remuzas

miradas innossentes

de dolu antigu,

raighinas de mudimine

t'an apasugadu

amarguras.

Cherva cassida

chiobada dae traschias,

gherridora 'e ruinas

chentza lamentu.

Risitos, ses solu risitos

...e ses nàschida betza.

Féminas de Olympos

Sas féminas de Olympos

an unu mundhu mannu

cantu una 'idha 'entosa

e sun meres de domos arrocarzadas

in costeras chentza pius Deos.

Bestidas de misteriu antigu

allisian sas dies e su tempus

cun unu limbazu 'iu

contivizadu che sidhadu 'e populu

umpare a su pane niedhu

cotu in foghiles mai tudados.

Sas féminas de Olympos

an sos colores de sas istajones

chi mudan pro rinascher a beranu.