Benvenuto nel nostro sito, che si propone di fornire una finestra sul presente ed il passato del nostro paese. Ci auguriamo che le informazioni da noi fornite possano essere di tuo interesse.

Cando calat su sole luminosu,
ca sa die agabbadu hat s’andera
e s’ispalghet s’iscuru minettosu,

s’azzenden sas istellas in s’aera;
a boltas b’est sa luna risulana
ch’isperiat sa terra; e passizera

calat a manzanile. Soliana
torrat sa die bella, indeorada
cun isplendore de lughe sovrana.

A manzanile sa vid’est fadada,
pien’e sonnios incantadores
ch’atera cosa mezus no bi nd’hada.

S’ispalghet totu, elvas e fiores
chi regalan sa massima bellura,
alimentende aficos mazores.

Su pesu est unu, una est sa misura,
s’ammentu amadu ‘e sos tenneros annos,
de sa etzesa ogn’unu hat paura.

A viver tota vida a brincos mannos,
senza connoschere sa traitoria,
de sa zente piena de ingannos.

Coronados de estru e fantasia,
‘ogni die leada a manu tenta,
senza presse ‘e vigliacca bramosia.

Pro isparire in totu sa lamenta,
incarnad’in dogn’essere vivente
cun cara risulana e cuntenta.

Che ch’apemus vint’annos solamente,
attraessemus s’andera terrena
cun animu serenu e innozente.

No b’hat de timer, sa nott’est serena;
pro chi s’iscuru attraet timore,
s’isperat sempre de sa luna piena.

Un’immensu oceànu de amore
nos abbrazzet che mama affettuosa,
pintend’a totu su santu candore.

Sa manu ‘e su perdonu maestosa
siat sigura che frimma guida,
cun custa idea santa e premurosa.

...foss’istamus piseddos tota vida.


Su deghe de Frealzu de su 2005.