|
Partidu Chiccu, in Barrastone discutini animadamente sa situazione. Marianzela no cheriat torrare insegus sa prommissa fatta a Nigola; fît bellu giovanu, forte, coraggiosu e li piaghiat meda; ma tottu sos suos si sunu appostos energicamente, l'isvoltana e li faghen leare a Chiccu, ca custu teniat tancas meda assoliende, cun d'unu 'acchile mannu de 'accas e teraccos e giuarzos in abbundanzia.
 Su babbu de Marianzela s'interessat personalmente da aggiustare sas cosas; chircat a Nigola e li narat: "Isculta, so 'ennidu a ti dare una novidade pagu consoladora pro te e pro me puru. Marianzela no est piusu in s'arrejonadu; su carveddu sou est troppu giovanu e-i su chi narat como no affirmat poi! Tue, piseddu de bonu sensu e de sabienzia profunda, creo chi hasa a perdonare s'ignoranzia de fiza mia e mia puru. Già ses pizzinnu, no disamines de ti cojuare; feminas si nde agattat atteras e so siguru chi una cumpagna pius accabada de fiza mia no ti mancat. No nos cherfas male e sighi a fagher s'onestu". Nigola, liju coment'e chera, hat iscultadu a ojos mannos sa notiscia e-i sa raccumandazione de cuddu chi aspiraiat de l'esser sogru cantu prima. Senza faeddu perunu, Nigola dat un'ultima ojada terrorosa a su babbu de Marianzela, girat sas palas e lu piantat immobile che una istatua de marmaru.
In Barrastone dezzidini pius accanidamente de fagher su coju con Chiccu. Si ponen tottu de accordu e fissan su fidanzamentu pro s'ultima dominiga de abrile. A sa zerimonia de s'abbrazzu, Chiccu, puntuale, tuccat a Barrastone cun sos parentes pius custrintos. Inie acciapat un’esercitu de invitados, tottu da-e sa parte de sa femina; ligan su coju a s'usanzia pius antiga; s'iscambian sos oggettos e si dan su primu 'asu. Su babbu de Marianzela haiat mortu una traila e petta bi nd'haiat in abbundanzia pro 'ustare e pro chenare, tantu chi hat fattu frimmare sos invitados pro mandigare e divertire a totta notte.
Sa notte, a ora de sas noe - noe e mesa, cando tottu fini in d'unu mare de consolos, ballende, cantende, buffende e mandighende cosas bonas, Chiccu, sezzidu con d'unu brazzu inghiriadu in costazos de sa bella sua, forsi astringhendela e carignendela, hat rezzidu unu colpu guasi mortale da-e sa carrela. Sa gianna fît mesu aberta; calc'unu, senza pensare a su perigulu chi lu podian bidere, dadu chi sa domo fît piena de zente, s'est acculziadu a calchi passu da-e s'intrada a fusile in faccia, leat de mira a Chiccu, faghet fogu e iscappat a currer pro si cuare in su Fossu de Sa Mela. Su tiru centrat a Chiccu in piena pettorra, chi s'isvortulat in coa de Marianzela. Parte de sa zente si prezipitat a succurrer su feridu, senza ischire ancora 'ene ite fît suzzessu; e parte, cumposta de giovanos coraggiosos armados a tottu puntu, bessit a chircare su tiradore.
A Chiccu, comente menzus han pottidu, che lu trajinan a Othieri e lu ponen sutt'a cura de unu grande duttore famosu. B'est istadu baranta dies sempre in lotta tra sa vida e-i sa morte. A sos baranta dies, Chiccu cominzeit a ponner calchi passu e adempire a sos doveres de fidanzadu e de pastore. Passan atteros sette o otto meses e poi isposat sa bella e perigulosa Marianzela.
Nigola fît iscumparfidu misteriosamente da-e sa circulazione; lu chircaiana, ma invanu, borghesos e giustiscia. Si fît avviadu da-e Ispiene e si fît postu a teraccare cun d'unu lumene farzu in sas costeras de Limbara e inie imbarat pro unu paju de annos, fina a cando l'han fattu su dibattimentu in contumazzia e l'assolven pro insuffizienzia de proas. Recuidu da-e bandidare e teraccare, Nigola s'est torradu a ponnere in movimentu pro si cojuare. Chircat a isposa una giovana de Oluitti (frazione de una deghina de foghiles, pagu lontana da-e Ispiene). Sa femina fît Martina Brundu, fiza de unu 'e sos baccarzos mannos de sa zona. Custu no teniat nudda in contrariu de zeder sa fiza a su partidu chi si fît presentadu, ma naraiat solu e sempre: "Nigola hat unu depidu mannu de torrare".
Nigola si fidanzat e s'isposat cun Martina verso s'ottantasette. Si faghet messaju mannu, pastore 'onu e cummerciante fentomadu de robba 'ula. Una die, in s'istiu de s'annu chi aiat isposadu, recuende da' un'arzola cun su giuale a pala e cun su puntorzu a bacchiddu, hat torradu su... depidu: l'han tiradu a fusilada da-e palas de una matta 'e chessa e lu ferin in modu no grave. Issu, però, s'est fattu de su mortu, timende de l'agabbare.
Appena sanadu de su tiru, Nigola si movet cun pius velenu pro cazziare a Chiccu. Pedru Pinna, però, omine de coraggiu e dignu de rispettu, dimorante in s'istazzu de Baldedu, s'interessat energicamente a fagher ponner paghes a sos duos inimigos. Los cumbinchet e in d'una die de maju de s'ottantaotto, los faghet abbrazzare e basare (mancari a ojos tortos) in mesu a dughentas personas tra invitados e curiosos.
E propriu da-e custu fattu, ancor'oe sa tanca ue sos duos inimigos si sunu abbrazzados (pro unu giro de circa norant'annos) hat mantesu su lumene de "Sa Tanca de sas Paghes".
-----
Cun custu contu, Bainzu Truddaju hat binchidu su XVIII Premiu de Poesia de Othieri - sezione prosa 1974. Su giornale La Nuova Sardegna l’hat pubblicadu su die 15 de Cabidanni de su matèss’annu.
Le foto: in alto, Bainzu Truddaju conduce all'altare la figlia Peppa. A destra, donne con bambina a Chiaramonti nel primo Novecento. |
